Katlego Suzan Phala, DA provinsiale woordvoerder oor vervoer en gemeenskapsveiligheid, het bevestig dat slegs drie dae ná die moord op ’n boer in die Dwaalboom-omgewing is nog ’n plaasmoord by Northam, in die Thabazimbi-munisipaliteit, aangemeld.
Die 59-jarige Nikolaas (Niko) Johannes Steenekamp se lyk is op 6 September op sy plaas gevind, nadat hy die vorige dag vermis geraak het.
“Die DA verwelkom die vinnige reaksie van die Suid-Afrikaanse Polisiediens (SAPD) sowel as gemeenskapsveiligheidsbeamptes wat gelei het tot die arrestasie van vier verdagtes wat in besit gevind is van mnr. Steenekamp se skootrekenaar en selfoon,” sê Phala.
’n Vyfde verdagte is gister in die Noordwes-provinsie in hegtenis geneem.
In ’n verklaring skryf luitenant-kolonel, Malesela Ledwaba, polisiewoordvoerder in Limpopo, dat speurders van die Northam- en Mogwase-polisiestasies ’n goed gekoördineerde intelligensie-gedrewe klopjag uitgevoer het nadat hulle inligting ontvang het oor waar die verdagte is.
“Die inligting het die span na ’n plek by Holfontein, in Noordwes, gelei waar die verdagte, ’n buitelander, in sy gehuurde kamer in hegtenis geneem is. Die ander vier verdagtes is vroeër Woensdag in hegtenis geneem,” sê Ledwaba.
Die kluis wat van die toneel geneem is, is teruggevind. Die polisie het ook heelwat juweliersware teruggekry.
Die vyf verdagtes, vier mans en ’n vrou, sal na verwagting binnekort in die Northam-landdroshof op aanklagte van moord en huisroof verskyn.