Die kwessie van Suid-Afrikaanse plaasmoorde en-aanvalle is vandeesmaand aan internasionale gehore in die hoofstede van België en Australië voorgehou.
In Brussel het die Unrepresented Nations and Peoples Organisation (UNPO) 'n resolusie van die VF Plus oor plaasmoorde aanvaar.
En in Perth het die gehoor by die 15de internasionale simposium van die Wêreldgenootskap van Slagofferkunde op Dinsdag, 7 Julie, na 'n AfriForum-voorlegging oor plaasmoorde geluister.
Dr. Pieter Groenewald, voorsitter van die VF Plus, “het die UNPO-kongres toegespreek oor gewelddadige aanvalle en moorde wat die landbougemeenskap as strategiese minderheid teiken,” lui 'n verklaring deur die party.
“Die UNPO gaan nou 'n beroep doen op die Suid-Afrikaanse Menseregtekommissie om sy ondersoekverslag oor plaasaanvalle uit te reik, en die Verenigde Nasies se menseregtekommissaris gaan gevra word om dit te aangeleentheid te ondersoek.
“UNPO het ook onderneem om Suid-Afrika se Regering te versoek om plaasaanvalle tot prioriteitsmisdaad te verklaar.”
Me. Lorraine Claasen, AfriForum-navorser, het in Perth in haar voorlegging gepraat oor navorsing oor plaasaanvalle wat 50 gevallestudies ingesluit het.
“Ons hoop om betekenisvolle internasionale bewusmaking rakende plaasaanvalle te bereik en dat die wêreld notisie sal neem met betrekking tot die wreedaardighede wat teen hierdie Suid-Afrikaners gepleeg word.
“Dit is noodsaaklik om die boodskap aan die buitewêreld te stuur dat, sedert 1990, 3 542 plaasaanvalle aangeteken is en dat 1 747 moorde in dié aanvalle gepleeg is.
“Die felheid van die probleem kan nie langer ongesiens verbygaan nie,” het Claasen luidens 'n verklaring van dié burgerregte-organisasie gesê.
Die verhouding waarteen Suid-Afrikaanse boere vermoor word, is bereken as 132,8 per 100 000 per jaar, teenoor die algemene nasionale moordverhouding van 32 per 100 000, en die gemiddeld elders ter wêreld van sowat 7 per 100 000.
Sowat 'n week voor Claasen se voorlegging het AfriForum en die TLU SA bekend gemaak dat daar van Januarie tot Junie vanjaar 27 plaasmoorde en 116 plaasaanvalle was en dat aksies om dit te bestry, uitgebrei word.
Mnr. Ernst Roets, adjunk- uitvoerende hoof van AfriForum, het gesê plaasmoorde moet voorrang geniet weens die frekwensie en brutaliteit daarvan, boere se rol as werkgewers en voedselverskaffers, en die ligging van plase waar die aanvalle plaasvind.
Volgens mnr. Henk van de Graaf, assistent-hoofbestuurder van die TLU SA, sal internasionale druk op die Regering toegepas moet word totdat hy sy steun gee. “Hulle moet tot daadwerklike aksie geforseer word,” het hy luidens 'n verklaring van die twee organisasies gesê.
